انتشر على الصفحات القبطيه على الفيسبوك بشكل كبير منشور تحذيرى من شخص غير امين يدعى بانه راهب من دير مارمينا ويستهدف بذلك الايقاع بالبنات المسيحيات
واليكم اعزائى زوار موقع اقباط مصر نص المنشور الذى شاركته عدد كبير من صفحات الفيسبوك اليوم
فى شخص عامل اكونت على الفيس باسم "ابونا أفا مينا الراهب" بيدعى أنه راهب بدير مارمينا، بيكلم البنات المسيحيات بطريقة غير لائقة. كلمنى أول أمس وأشكر ربنا كشفته فى دقايق معدودة، بسبب ألفاظه القذره. كلمت مسئولين بدير مارمينا، وأكدوا لى أنهم مايعرفهوش وانه مش راهب بالدير. وطلبوا منى أنشر تحذير من التعامل معاه.
أولاً: مافيش راهب اسمه "أفا مينا" الأسم ده هو عمله من يومين. وقبل كده كان مسمى نفسه "ابونا مينا الراهب". هو تقريباً شاف أو سمع كلمة "أفا مينا" وعجبته، فاستخدمها بدون ما يعرف معناها.
ثانياً: هو واضع صور لرهبان غير واضح فيها ملامح الوجه. والصور المرفقة فى البوست هى اللى بيستخدمها كبروفايل للأكونت بتاعه.
ثالثاً: بيستخدم رقم تليفون 011 ولما كلمنى ظهر عندى على التروكولر باسم "اسراء". وأكيد عنده كذا خط تليفون غيره.
رابعاً: بيدعى أنه كان متوحد، ثم قرر يخرج من توحده، علشان يعمل معجزات للناس. طبعاً مافيش راهب بيقول عن نفسه كده.
خامساً: بيبدأ كلامه مع البنات بصلوات لهم زى "ربنا يباركك يا بنتى" وغيرها. وبعدين يطلب منهم يتصلوا به، ولما بيتكلم معاهم فى التليفون بيحاول يتكلم عن أمور شخصية. ووسط الكلام بيقول ألفاظ جنسية وغير لائقة. ألفاظ مستحيل تصدر عن راهب أو حتى من علمانى محترم.
ياريت تاخدوا بالكم.
ربنا يحمى أولاده وبناته من أمثال هذا الشيطان.
